Одбојкарите на Штип УГД очекувано и убедливо славеа во првото полуфинале на Ф4 турнирот од Купот на ОФМ кој денеска почна во Радовиш. Во салата „25 Мај“ избраниците на тренерот Кристиан Ристески одиграа одличен меч против Работнички и потврдија дека и во саботното финале влегуваат во одлична форма во обид да ја одбранат куп-титулата.
ШТИП УГД – РАБОТНИЧКИ 71&22 3:0 (25:13, 25:22, 25:20)
Работнички стартуваше солидно, успеа да одржи резултатски егал на стартот од првиот сет, но продолжението беше разочарувачко. Момците на Александар Тасевски го загубија првиот сет со само 13 поени, што веројатно беше голем мотив во вториот сет да одиграат многу подобро. Тоа се виде и на теренот, а и низ резултатот. Штип доби солиден отпор, но го реши и вториот сет во своја полза со 25:22.
Во третиот сет штипјани поведоа на стартот и разликата од неколку поени успеаја да ја одржат во текот на целиот сет. Во завршницата Работнички успеа да се приближи на негатива од два поени (21:19), но Штип не дозволи изненадување и го реши и овој сет во своја полза со 25:20.
