Со двата полуфинални дуели во машка конкуренција, денеска во салата „25 Мај“ во Радовиш започнува финалниот турнир од одбојкарскиот куп на Македонија во машка и во женска конкуренција.
Бранителот на трофејот Штип УГД во првото полуфинале од 16 часот ќе се соочи со Работнички 71&22, додека во вториот попладневен дуел ќе се сретнат екипите на Струмица 47&72 и ГОК Борец. Штипјани имаат сериозни амбиции оваа сезона, откако го запоседнаа врвот на табелата во домашното првенство, а со фаворитска улога влегуваат и во денешното полуфинале. Еден од најдобрите одбојкари на штип УГД, Стефан Алексов, пред денешниот меч со Работнички вели дека не очекува интересна завршница на купот и оваа сезона.
„Очекувам возбудлива завршница на одбојкарскиот куп на ОФМ. Во полуфиналето не очекува дуел со Работнички, тим кој секогаш игра цврсто и мотивирано. Како бранители на трофејот, ние во Штип УГД сме максимално подготвени и мотивирани да ја одбраниме титулата. Знам дека нема да биде лесно, но ќе дадеме сè од себе да стигнеме до финалето и повторно да го подигнеме пехарот. Се надевам на добра игра и фер натпреварување, и ги поканувам и сите љубители на одбојката да дојдат и да ја поддржат својата екипа“, вели Алексов.
Штип УГД минатата година успеа да направи историски резултат освојувајжи го куп-трофејот, но оваа сезона и Работнички и Борец, а особено Струмица ќе бидат сериозни конкуренти за куп-титулата.
КУП НА ОФМ 2025
ПОЛУФИНАЛЕ МАЖИ, ДЕНЕСКА:
16.00 ШТИП УГД – РАБОТНИЧКИ 71&22
19.00 СТРУМИЦА 47&72 – БОРЕЦ
