Кошаркарите на Пелистер максимално подготвени го дочекуваат последниот меч од регуларниот дел од сезоната. Битолчани денеска му гостуваат на ТФТ, дуелот е закажан со почеток во 17 часот.
„Зелено-белите“ врзаа две победи против Чаир и Вардар, а целта е јасна – да се слави против скопски прволигаш за што подобар пласман во пресрет на плејофот. ТФТ има 35 бода, додека пак Пелистер еден помалку, факт кој ја прави нивната пресметка уште поинтересна.
„Она што е клучно е да одиграме со висока енергија од првата до последната минута, тоа е неопходно кога се игра со ривал како ТФТ. Бележиме значителен напредок во последниот месеци, пред се од аспект на колективната игра. Тука сме еден за друг, си помагаме и тоа дава резултат. Tоа беше видливо на неколку натпревари, но мораме да влегуваме со идентичен пристап во сите дуели до крајот на сезоната, почнувајќи токму од мечот со ТФТ. Ќе играме со тим што е добро трениран, што има искусни кошаркари и знае како да го контролира темпото. Затоа, мораме да одиграме перфектен меч ако сакаме да стигнеме до победата“, изјави Брајан Антоан, американскиот бек во редовите на Пелистер.
Првиот овосезонски меч меѓу Пелистер и ТФТ заврши со победа на битолчани од 91-82.
Покрај оваа средба денеска (12 часот), МЗТ Скопје е домаќин на Тиквеш, додека пак Чаир го пречекува Гостивар (19 часот).
