За првпат во својата клупска историја, екипата на Наковски Волеј го освои Купот на Македонија. Во финалето на Ф4 турнирот од Купот на ОФМ во Радовиш, избраничките на тренерот Александар Митев во исцрпувачки меч во пет сета славеа со 3:2 над големиот ривал Јанта Волеј, кој засега е најдобриот тим оваа сезона во домашното првенство во женска конкуренција.
НАКОВСКИ ВОЛЕЈ – ЈАНТА ВОЛЕЈ 3:2 (16-25, 25-18, 10-25, 25-21, 15-13)
По две неуспешни финалиња и два порази досега, Наковски волеј имаше трета среќа и денеска успеа да го надигра големиот ривал за голема радост на својата публика, иако лидерот подобро го отвори мечот. јанта Волеј самоуверено тргна и успеа да го освои воведниот сет со 25:16, но струмичанки веќе во вториот потврдија дека не мислат да се предадат.Го кренаа нивото на играта, израмнија, но во третиот сет повторно потонаа, оставајќи му на противникот еден многу лесно добиен сет.
Во стилот на вториот сет, Наковски Волеј во четвртиот се врати со добра игра и во неизвесна завршница успеа да се избори за тај-брејк. Од стартот во овој решавачки сет Наковски волеј имаше предност, Јанта Волеј постојано бркаше негатива, но струмичанки успеаја да ја задржат предноста и да дојдат до голема радост.
Во 19 часот на Ф4 турнирот во Радовиш се игра машкото куп-финале меѓу Штип УГД и Струмица.
