Спортската сала „25 Мај“ во Радовиш попладнево ќе биде домаќин на двете големи финалиња во новото издание на одбојкарскиот Куп на Македонија. По дводневната полуфинална програма, денеска навивачите на четирите финалисти со нетрпение ги очекуваат финалните дуели по кои же ги добиеме првите носители на трофеи за оваа сезона.
Во 16 часот во првото финале силите ќе ги одмерат екипите на Наковски волеј и Јанта волеј, кои во вчерашните полуфинални дуели кај дамите со максимални победи го потврдија своето место во финалната пресметка. Според резултатите сезонава фаворитската улога ја имаат скопјанки, но Наковски Волеј во неколку наврати и оваа сезона покажа дека знае да направи изненадувања.
Во машкото финале три часа подоцна (19 ч.) ќе гледаме очекувана финална пресметка меѓу двата убедливо најдобри тимови во домашното првенство оваа сезона. Бранителот на трофејот и лидер на табелата во првенството, Штип УГД денеска ќе оди на одбрана на куп-пехарот, додека се уште актуелниот шампион Струмица ќе се обиде да си го врати пехарот во своите витрини по една година пауза.
КУП НА ОФМ – „25 МАЈ“, РАДОВИШ
ФИНАЛНА ПРОГРАМА, ДЕНЕСКА:
16:00 (ФИНАЛЕ ЖЕНИ) / Наковски Волеј – Јанта Волеј
19.:00 (ФИНАЛЕ МАЖИ) / Штип УГД – Струмица
Двата тима најавуваат голема поддршка од трибините, а штипјани имаат и организиран превоз за Радовиш.
„Во екипата преовладува одлична и доста позитивна атмосфера пред финалето и со нетрпение го очекуваме натпреварот. Екипата на Струмица ни е добро позната. Имаат неколку промени во нивниот начин на игра, нешто што јас и го очекував после промената на првиот тренер. Подготвени сме максимално за овој натпревар. Очекувам голема борба со доста неизвесност и надмудрување за секој поен и на крај победа за Штип УГД и одбрана на куп-титулата. Организиравме превоз за сите оние кои сакаат да го следат финалето во Радовиш. Поаѓањето е во 17:30 часот од постројката пред домот на културата. Па ги повикувам сите љубители на одбојката во Штип, доколку се заинтересирани, да ја искористат можноста да присуствуваат на финалето“, вели младиот стратег на Штип УГД, Кристиан Ристески.
