Струга ТЛ – Пелистер 4:1. Ова е крајниот исход од првиот меч од 26.коло во ПМФЛ. Заслужена победа на шампионот за кого ова е “загревање“ за она вистинското, а тоа е првиот меч од 1/2 финалето во Купот на Македонија во среда со Шкендија под Шара.
Интересно беше денеска во Струга. Поведоа домашните со голот од пенал на Кехинде во 22.минута. Веќе во 29.минута беше 1:1, исто од пенал, но сега стрелец беше Ристевски за гостите, инаку екс играч на стружани.
Во 45+5.минута Бошковски направи непотребен фаул во два наврати над еден домашен играч и доби втор жолт, односно црвен картон.
Јасно беше дека тука беа крај сите надежи на битолчани предводени од стратегот Срѓан Захариевски, инаку некогашен тренер на Струга ТЛ. Прашање на време беше кога Струга ТЛ ќе дојде до головите. Прво тоа го направи Влајковиќ во 47.минута, за да победата ја потврди капитенот Шабани во 75.минута откако претходно одлично проигра со Кехинде за 3:1.
Но тоа не беше се, Кехинде во 90+3.минута ги постави конечните 4:1.
Претходно Кехинде можеше во 90+1.минута да постигне уште еден гол, но од зицер позиција ја погоди само стативата на гостите.
Со овие три бода Струга ТЛ се врати во игра за 3.место кое води директно во Европа, сега е на -6 бода во однос на Работнички а има и меч помалку. Сепак во некои комбинации и 4.место може да води во фудбалска Европа.
Останатите натпревари од ова 26.коло се закажани за утре од 15 часот.
