Екипата на Алкалоид по првата полуфинална пресметка против Рунар во рамките на ЕХФ Европскиот Куп има предност од 42-37. Единствениот македонски претставник на европска сцена успеа да го издржи скандинавскиот ритам и да одигра уште еден добар меч во ова натпреварување. Момците на Лазаров добро се справија и со играта „седум на шест“ на противникот во вториот дел.
Мартин Серафимов со десет гола беше прв стрелец, седум имаше Џонов, по четири запишаа Петковски, Карасманакис, Ѓоргиев и Стојковиќ. Галевски имаше 4 одбрнани, додека Кизиќ три.
Алкалоид во првите седум минути направи неколку почетнички грешки, кои гостите ги искористија да поведат со 1-3. Првите три гола во овој период македонскиот тим ги постигна од седум метри, сите беа дело на Мартин Серафимов (3-4). Избраниците на Кирил Лазаров со последниот пенал на Серафимов и реализација на Стојковиќ во 9-тата минута го запишаа првото водство (5-4).
Очекувано, дуелот продолжи со игра гол за гол, се играше брз ракомет. На стартот на 13-та минута, Алкалоид остана со двајца играчи помалку на теренот, па гостите вратија за 8-9. Но, дојде време да греши противникот, па македонскиот тим знаеше како да казни, во 20 минута македонскиот тим имаше водство од 15-12, не искористи напад за плус четири. Шанса да ја зголеми позитивата на истата разлика имаше и во 25 минута, при 18-15, Карасманакис направи пробивање. Сепак норвешкиот тим покажа дека зошто е важно да се има фокус цело време, на одморот успеа да намали на еден гол негатива (21-20).
Силното темпо продолжи и во вториот дел, со тоа што Рунар после седум минути успеа да поведе со плус два (24-26). Алкалоид успеа да израмни, не искористи шанса да го врати водството. Гостите се решија за „седум на шест“ во нападот, па Лазаров повика тајм-аут. После новата негатива од два гола (27-29), Алкалоид најде начин да се врати, со серија од 9-3 дојде на плус четири (36-32) во 51. минута. Македонскиот тим имаше шанси да ја зголеми позитивата, но не искористи неколку моменти, важен удел имаше Иван Галевски.
Избраниците на Лазаров плус четири (38-34) имаа и во 55-та минута, голема штета е што направија пробивање и не ја искористија шансата да поведа со пет гола. Ова го сторија на минута и пол до крајот, Џонов погоди празна мрежа за 41-36. На крајот Алкалоид успеа да го заврши мечот со 42-37.
Реваншот се игра за седум дена на теренот на Рунар.
