Словенечката кошаркарска ѕвезда Лука Дончиќ ќе има право на продолжување на договорот со Лос Анџелес Лејкерс почнувајќи од 2 август. Многумина очекуваат дека Леброн Џејмс, како лице на франшизата на ЛА Лејкерс, ќе биде оној што ќе се обиде да ја убеди словенечката ѕвезда да се посвети на клубот долгорочно, но четирикратниот шампион на НБА гледа поинаку на тоа.
„Не, тоа не е моја работа“, рече Леброн Џејмс, кој се повреди во последниот натпревар од плејофот.
„Мислам… всушност знам дека Лука знае што чувствувам за него. На крајот, оваа размена беше направена за иднината. Веќе не зависи од мене. Лука мора сам да одлучи што сака да прави со својата кариера. Тој има 26, а јас 40 – не може да ја гради својата иднина врз мене. Тоа е едноставно реалноста“, вели легендата на НБА лигата.
Лука Дончиќ и Леброн Џејмс се соиграчи само од февруари, и иако нивното заедничко патување беше кратко, тие веќе покажаа добра хемија на теренот.
