Тренерот на Интер, Симоне Инзаги, истакна дека неговиот тим одиграл со своите силни страни против Барселона и заслужено стигнал до финалето на Лигата на шампионите.
„Мора да им честитаме на Барселона бидејќи тие се навистина силен противник. Потребен беше супер Интер, па им честитам на моите момци за двата неверојатни настапи. Тоа беше единствениот начин да стигнеме до финалето. Горд сум што сум нивен тренер бидејќи дадоа сè од себе, а и оние што дојдоа од клупата исто така покажаа правилен менталитет“, рече Инзаги по натпреварот.
Ова ќе биде второ финале за Инзаги, кој беше на еден чекор од „ушите“ во 2023 година кога Интер загуби од Манчестер Сити со 0-1.
„Играчите мора да уживаат во секој момент пред овие навивачи. Навистина сме среќни. Ова се примери за гордост. Им реков да веруваат дека можеме да се обидеме да ја ограничиме Барселона, иако не беше лесно. Лаутаро, Дамфрис и Фратеси не беа 100% подготвени, па мораше да ги користиме нашите срца за да ја надминеме секоја пречка. Се обидовме да играме со нашите силни страни. Никогаш не бевме арогантни, дадовме сè од себе и заслуживме да стигнеме до финалето“, додаде Инзаги.
Тренерот на „нероаѕурите“ зборуваше и за играчите кои го импресионираа од спротивниот табор, а изненадувачки неговото внимание не беше насочено кон големата ѕвезда на Барселона – Ламине Јамал.
„Се зборуваше многу за Јамал, но видов уште еден исклучителен играч во овие два натпревари, кој беше повреден последниот пат кога игравме против нив. Френки де Јонг ме импресионираше исто колку и Јамал. Тој ја чисти топката, додава добро, тој е прекрасен. Не би ги менувал моите играчи за никого на светот, но во двата натпревари го најдов Де Јонг навистина сензационален“, објасни Инзаги.
Интер ќе го дознае својот противник за неколку часа, кога ќе се одигра реваншот од другиот полуфинален натпревар помеѓу Пари Сен Жермен и Арсенал. Таму Французите поведоа минимално со 1:0 по првиот натпревар.
