Навивачите Евертон ќе се збогуваат емотивно со стадионот „Гудисон Парк“ во недела, на натпреварот со Саутемптон во рамките на 37-то коло од Премиер-лигата. За потсетување, клубот од Ливерпул се подготвува да се пресели на нов стадион на Брамли-Мур Док.
Историскиот стадион е од 1892 година. Наместо да биде срушен, „Гудисон Парк“ ќе биде реконструиран од сезоната 2025/2026 да стане постојан дом на женскиот тим на Евертон.
Навивачите што ќе присуствуваат на последниот домашен натпревар на машката екипа на „Гудисон Парк“, против Саутемптон на 18 мај, ќе добијат посебна дозвола да го прекршат строгиот протокол на Премиер-лигата што е во сила веќе 40 години. Досега беше забрането да се консумира алкохол на седиштата, но тоа ќе се промени овој викенд поради посебна програма по натпреварот.
Во соопштение објавено на официјалната веб-страница на клубот, Евертон објави:
„По последниот свиреж, навивачите ќе бидат замолени да останат на своите места за специјална програма на теренот во која ќе бидат вклучени гостински презентери, настапи на поранешни и сегашни играчи, музички изведби во живо и специјално курирана програма на големо платно што ќе го долови духот, спомените и историјата на стадионот“.
Церемонијата, наречена „Крај на една ера“, ќе трае приближно еден час, а по завршувањето, од сите гледачи ќе биде побарано да го напуштат стадионот. По натпреварот, навивачите ќе можат да купат храна и пијалоци, вклучително и алкохол, од кетеринг-продажните места на „Гудисон“ и да се вратат на своите места за да уживаат во програмата.
