Англија, Ирска, Шкотска и Велс, домаќините на Европското првенство во фудбал во 2028 година, ќе учествуваат во квалификациите за натпреварувањето, а за нив ќе бидат резервирани само две места доколку не успеат да се квалификуваат за турнирот, објави во среда УЕФА.
Одлуката ја донесе Извршниот комитет на УЕФА, кој се состана во Билбао пред финалето на Лигата на Европа. Четирите домаќини ќе бидат извлечени во посебни групи, а 12-те победници на групите и осумте најдобри второпласирани (20 национални селекции) ќе одат директно на завршниот турнир.
„Две места на завршниот турнир ќе бидат резервирани за двете највисоко рангирани екипи домаќини кои не се квалификувале како победници во групата или најдобри второпласирани по завршувањето на квалификациската групна фаза“, се вели во соопштението на УЕФА.
Преостанатите места ќе бидат одредени преку плејоф натпревари помеѓу преостанатите второпласирани екипи во квалификациските групи и највисоко рангираните победници од неквалификуваните групи од Лигата на нации на УЕФА 2026/27, се додава во соопштението.
„Во зависност од бројот на места што ги користат земјите домаќини, бројот на места на финалниот турнир што ќе се одлучат преку плејофот може да варира помеѓу два и четири.“
Натпреварите од ЕУРО 2028 ќе се играат на девет места во Обединетото Кралство и Ирска.
