Иван Галевски на првата финална средба во Атина беше една од клучните алки на Алкалоид за победата од четири гола. Тој одбрани пет од шест пенали, на крајот зад своето име запиша осум интервенции.
Младиот голман е среќен што реваншот се игра пред домашна публика, верува дека со добро спроведена тактика ќе успеат да испишат историја.
„Како што знаете АЕК е искусна екипа со играчи етаблирани во светскиот ракомет. Иако имаме плус 4 од претходниот меч, нема да биде лесно знаеме каква екипа доаѓа во Скопје. Ја имаме онаа предност која ја немавме претходно, публиката – нашиот осми играч. Ако сме добри и ако го спроведиме она што ни го кажува Лазаров ќе успееме да го подигнеме пехарот, што не е мала работа за клуб кој постои четири години“, изјави Иван Галевски.
Реваншот е закажан за во недела со почеток во 20:30 часот.
