Купот на Македонија по вторт пат се одржува во Охрид. Денеска и утре овој град ќе живее во ритамот на ракометот, а една од главните причини е што градскиот тим ќе биде дел од завршницата во ова натпреварување.
Во првата полуфинална двојка ќе се сретнат бранителот на трофејот, Алаклоид и Вардар 1961, додека во втората домаќинот ГРК Охрид игра против Пелистер.
„Ќе се обидам како колегите од другите три клуба да ги изнесам општите впечатоци. Алкалоид го брани трофејот, а согласно тоа за нас овој турнир е посебен. Јасно е дека полесно е да освоиш, отколку да одбраниш трофеј. Ние се соочуваме со таков предизвик, особено бидејќи прв ривал ни е Вардар, кој е претендент за трофејот и во Суперлигата. Само ќе потсетам дека Алкалоид е сериозно хендикепиран во пролетниот дел од сезоната, без многу првотимци кои се повредија. Без разлика со кој состав ќе настапиме, ќе се обидеме да забележиме добар резултат. На сите учесници на Ф4 турнирот им посакувам среќа и успех“, изјави Зоран Цветановски.
Овие два тима и лани играа во полуфиналето на Купот на Македонија.
„Благодарност до ГРК Охрид и градот за условите, прекрасно е да се биде тука. Првпат на ваков начин се организира. Шансите на сите екипи се еднакви, Купот е такво натпреварување и кој повеќе ја посакува победата ќе победи. Пресудна е желбата во вакви натпревари. Екипите се тие, доволно се познаваме и имаме многу меѓусебни натпревари. Се надевам се ќе биде во ред, одиме меч по меч. Прво против Алкалоид, да одиграме како што знаеме, а потоа ако стигнеме во финале да го освоиме трофејот“, рекоа од Вардар 1961.
Од таборот на ГРК Охрид посакуваат одличен ракомет и уште подобра организација од претходната. Посакуваат финале.
