После 36 години посветеност на кошарката, Перо Стамески, тренерот на Бадел 1862 стави крај на својата кариера. Тој е вистинска историја во овој тим, но и во женската кошарка.
Стамески освои 9 шампионски титули со сениорскиот тим, 6 во Купот на Македонија и бројни трофеи во младинските категории.
Бадел 1862 на својата официјална страница му се заблагодари на Стамески.
„После 36 години несебична посветеност, пожртвуваност и искрена љубов кон кошарката, со голема почит и емоции соопштуваме дека тренерот Перо Стамески – човекот кој не само што ја испиша историјата на нашиот клуб, туку и ја обликуваше иднината на многу генерации кошаркарки, заминува во пензија.
Ова не е збогум, туку до видување. Ќе останете дел од оваа кошаркарска фамилија засекогаш, со местото што ви припаѓа – во срцето на ЖКК Бадел 1862 и историјата на македонската кошарка“, се вели во објавата на Бадел.
