Винсент Компани зборуваше по поразот на неговиот тим Баерн Минхен со 0:2 од тимот на Пари Сен Жермен во 1/4 финалниот натпревар од Светското клупско првенство. Логично, најважниот момент од говорот на баварскиот тренер беше повредата на неговиот играч Џамал Мусиала.
„По она што се случи со Мусиала, емоциите беа силни бидејќи не ни се допадна тоа што се случи. Се надеваме дека не е сериозна повреда и дека ќе добие најдобар можен третман тука. Се случуваат вакви работи. Мора да останеме смирени. Беше несреќа. Минута пред крајот на полувремето… Многу жално“, рече Компани.
Тренерот на германскиот гигант не сакаше да даде никаква проценка за сериозноста на повредата, но нагласи дека почувствувал многу лутина по неа.
„Тешко е, никогаш не сум бил толку лут, но не сум лут на играчите, туку затоа што му се случи нему. Има многу други работи во животот што се важни, но за овие деца, фудбалот е нивниот живот. Се чувствувате беспомошни во вакви ситуации. Она што ме прави да вријам од гнев не е поразот, туку она што му се случи на Мусиала. Не изгледа добро“.
Победата во овој натпревар му припадна на Пари Сен Жермен, кој победи со 2-0, а елиминацијата од турнирот значи и збогување на Томас Милер со тимот на Баерн.
