Почетокот на новата сезона во Премиер-лигата го одбележа срамен инцидент на „Енфилд“. Натпреварот меѓу Ливерпул и Борнмут (4:2) беше прекинат поради расистичко навредување насочено кон гостинскиот фудбалер Антоан Семенјо (25). Од трибините беше отстранет еден маж, а полицијата отвори истрага, пишува „Sky News“.
Во 29. минута Семенјо му пријде на судијата Ентони Тејлор и пријави расистички испад од трибините, по што судијата веднаш ја запре играта. На публиката на стадионот ѝ беше прочитана порака против дискриминација, а полицајци на полувремето ја посетија судиската соблекувална.
Полицијата на Мерсисајд потврди дека 47-годишен маж е идентификуван и отстранет од стадионот и дека истрагата е во тек.
Семенјо одговори на теренот, капитенот огорчен
И покрај непријатниот настан, Семенјо во второто полувреме покажа извонредна ментална сила и постигна два гола за Борнмут, но Ливерпул на крајот славеше со 4:2.
Адам Смит, капитенот на Борнмут, по натпреварот за „Sky Sports News“ изјави:
„Ова не смее да се случува. Искрено, не знам како Антоан продолжи да игра и ги даде тие голови. Тоа е целосно неприфатливо. Мора нешто да се направи. Клечењето нема ефект. Го поддржуваме и се надеваме дека ќе биде добро. Сакав да реагирам бидејќи јас така би направил, но ова покажува каков човек е тој. Да ги постигне тие голови покажа каков карактер има. Играчите на Ливерпул исто така му дадоа поддршка на Антоан и на тимот. Се реши на вистински начин, но толку сум лут. Не знам што повеќе можеме да направиме. Никој тоа не го сфаќа. Веќе не знам што да кажам. Едноставно ми е жал за Ант. Шокантно.“
Овој инцидент се случи само два дена откако фудбалерот на Тотенхем, Матис Тел, беше мета на расистички навреди на интернет по промашениот пенал во мечот од УЕФА Суперкупот.
