Европската одбојкарска конфедерација (ЦЕВ) ги потврди термините за првите натпревари на македонските претставници во Лигата на шампионите за новата сезона.
Шампионот во машка конкуренција, екипата на Струмица, првиот натпревар од 1. квалификациско коло во Лигата на шампионите ќе го одигра на домашен терен против романскиот великан Динамо Букурешт. Мечот е закажан за 21 октомври во струмичката сала „Парк“, со почеток од 19 часот.
Судии на мечот ќе бидат бугарскиот интернациоалец Добромир Добрев и грчкиот судија Василеос Василеиадис. Реванш средбата е закажана на 28 октомври во Букурешт со почеток по 18 часот.
Шампионот во женска конкуренција, екипата на Јанта Волеј, своето деби во најсилната европска конкуренција ќе го има на 22 октомври во СЦ „Јане Сандански“, со почеток од 20:30 часот. Противник на нашите шампионки е екипата на ЖОК Гацко од Босна и Херцеговина.
Судии на мечот во Скопје ќе бидат Рој Бенсимон од Израел и Теодора Кириопули од Грција. Реваншот е закажан за 29 октомври со почеток од 18 часот во Требиње.
