Денеска во Гостивар (16:30 Ч) во меч од 4.коло во нашата елитна лига, силите ќе ги одмерат Арсими и Силекс. Секако дека се очекува голема битка за секоја педа од теренот. Тимот од Чегране посакува да дојде до уште едно големо изненадување, ако се знае дека минатиот викенд среде Тетово одигра 0:0 против Шкендија.
Од друга страна Силекс е лидер, има три победи и максимални девет бода, нема примено гол, но исто така една од тие победи беше службена со Шкупи, а дома славеше убедливо со Брера и Македонија ЃП.
Се чини дека ова ќе биде првиот посериозен тест за четата на Александар Васоски во оваа сезона.
Еве што велат од таборот на домашниот тим:
„„Свесни сме дека не очекува многу тежок натпревар против квалитетен противник каков што е Силекс. Знаеме дека ќе биде голем предизвик, но нашиот тим работеше со посветеност во изминатиот период и сме максимално мотивирани да дадеме сè од себе на теренот.. За нас е важно да прикажеме дисциплинирана игра и да се бориме до последниот свиреж за позитивен резултат. Ги повикуваме навивачите да бидат со нас, затоа што заедно со нив веруваме дека можеме да ги оствариме нашите цели и да ја завршиме оваа фаза со позитивен резултат.“ посочи Малиќ Белули, играчот за врска на Арсими.
Капитенот на кратовци, Дарко Анѓелески има свое видување:
„Сакаме во Гостивар да одиграме добар натпревар, да наметнеме наш ритам од првата минута и со поволен резултат да се вратиме во Кратово. Се надевам дека ќе ја продолжиме серијата на победи и натпревари без примен гол. Играме против добар тим со доста нови фудбалери во своите редови. Добро ги анализиравме, цела недела се подготвувавме за овој натпревар и сметам дека ако ги исполниме задачите од стручниот штаб од првата до последната минута, со поволен резултат ќе си заминеме од ова гостување. Амбициите на Силекс се исти како и минатата година, местата што водат во Европа. Секако, ако имаме шанса да се бориме и за титулата, ќе се обидеме максимално да ја искористиме. Најважно е да бележиме добри резултати, да влегуваме мотивирани во секој меч и да одиме на трите бода.“
