Алкалоид со негатива од гола се враќа од првиот квалификациски дуел против фаворитот Хановер за пласман во групната фаза во Европската лига, откако на гостински терен беше совладан со 37-27.
Реваншот е закажан за 6. септември во салата во Автокомнда, актуелниот освојувач на ЕХФ Европскиот Куп со поддршка од домашната публика ќе има шанса да се покаже во подобро издание и секако да ја поправи реализацијата. На оваа средба, Алкалоид реализираше 5 од 10 седмерци.
Иако беше најавен директен пренос, сепак поради проблеми од страна на германска страна, на МРТ не се емитуваше мечот меѓу Хановер и Алкалоид.
Добра игра на избраниците на Кирил Лазаров во првите 15 минути од првото полувреме против фаворизираниот бундес-лигаш не беше изненадување, но неискористените шанси и бројните промашувања од чисти позиции, и проблемот со изведување на удари од седум метри на крајо си го сторија своето.
Хановер на стартот поведе со 4-2 и 5-3, период во кој Серафимов не реализираше од седум метри. Но, Алкалоид трпеливо ја градеше својата игра и ја чекаше својата шанса, прво израмни на 6-6, а потоа во 11-тата минута која со головите на Тордарсон и Серафимов поведе со 8-9. Технички грешки и две минути исклучувања беа доволни за да противникот поведе со највисоки 14-11 во 17 минута. Борзаш одговори по тајм-аутот на Лазаров, Галевски запиша две одбрани, но соиграчите не го искористија тоа.
Германскиот тим дојде на плус 5 (18-13) откако Петковски, Џонов, Борзаш, а потоа Серафимов (не реализираше од седум метри) беа непрезицни. Дамјан Митев ја прекина лошата серија на Алкалоид за 18-14, Ѓорѓиев доближи на 18-15. На одморот македонскиот тим заминува со минус 4 (19-15).
На стартот на второто полувреме, Алкалоид остана со играч помалку откако Велковски заработи црвен картон по реализацијата за 20-16. Во 36-та минута, Хановер поведе со 25-19. Серија на нови технички грешки на ракометарите на Алкалоид за бундес-лигашот значеше ново поголемо водство од осум гола 29-21 на средината на првото полувреме. Хановер дојде и на двоцифрени 36-26, на крајот мечот заврши со конечен резултат од десет гола негатива (37-27).
Галевски запиша осум одбрани, новото засилување Тордарсон запиша десет гола од 16 обиди, зад него беше Борзаш со четири погодоци од девет обиди.
