Екипата на Алкалоид денеска (17 часот) го игра првиот меч против Хановер за пласман во групната фаза во Европската лига. Актуелниот освојувач на ЕХФ Европскиот Куп одлучи да оди едно скалило погоре во својата трета европска сезона. Дуелот се игра на гостински терен, а од истиот ќе има директен пренос на МРТ.
Бундес-лигашот е фаворит на овој двомеч, но гледајќи ги сезоните наназад нема да биде чудо доколку Кирил Лазаров и неговите момци успеат да направат изненадување.
„Ние како клуб одлучивме да излеземе од комфорната зона и да играме во Европската лига, по оној освоен ЕХФ Куп во кој има силни противници, тоа може да се види по листата и оваа година. Сакаме да одиме чекор понапред, прифативме ризик. Имавме малку незгодна ждрепка, добивме бундеслигаш. Успеав по ждрепката да изгледам неколку мечеви и увидов зошто во текот на Бундеслигата во поголемиот дел беа на првото место. Се работи за систем со екстра-квалитетен тренер, бивш селектор на репрезентацијата на Германија, на секое зошто има затоа. Ривалот е фаворит, но ние ќе се бориме и нема да се предадеме“, изјави Лазаров пред стартот на подготовките за новата сезона.
Алкалоид на овој дуел влегува со квалитетни подготовки и како победник на меѓународниот турнир што се одржа во Словенија.
Во составот на тимот од Автокоманда има неколку измени, дојдоа осум ракометари: Ненад Костоски, Емилијан Ѓорговски, Михаил Аларов, Михаил Ивановски, Ѓорѓи Николовски, Давид Трајковски, Урош Борзаш и Монси Тордарсон.
Вториот меч се игра во салата „Автокоманда“ на 6 септември со почеток од 19:30 часот.
