Огнен Чак Дојчиновски
Не постои фудбалски фанатик, кој што во својот живот барем еднаш не си помислил, како ли е да се игра легендарно дерби од типот на Интер – Милан, Рома – Лацио, Јунајтед – Сити, па ако сакате и Црвена Звезда – Партизан. Градска пресметка во која што она што се случува на терен има влијание на животот на стотици, милиони навивачи. Нема човек кој што не си замислил излегување од тунелот и зачекорување на стадион кој знаеш дека во себе носи стотици години историја на тоа место, и дека ти си некој посебен во тие деведесет минути. Привилегиран, одбран што се вели.
Бојан Миовски е одбран. Одбран во следните четири години да го носи дресот на легендарниот шкотски тим Глазгов Ренџерс, за кој што клуб вчера и официјално се обврза на соработка. И веќе денеска да го игра големото дерби против Селтик. Да биде следниот голем напаѓач на овој легендарен тим. Да биде наследникот на Џејмс Таверние, Крис Бојд, Кени Милер. Начо Ново…. на легенди на овој клуб. Многумина би сакале да се на негово место сега но Миовски е таканаречениот „is the chosen one“.
По лошиот период во шпанска Џирона, нашиот репрезентативец се враќа во Шкотска и станува дел од нешто што се вели жива фудбалска историја.
„Како се чувствувам? Преморен, но пресреќен. Малку сум спиен, но тоа е најмал проблем… хаха. Кој може да заспие кога потпишуваш за ваков клуб. Гразгов Ренџерс еј…..Лудило… се се случи за многу краток период. Неколку дена. Една недела максимум. Пристигна понудата, онаква каква што посакувавме. Телефонски повик од менаџерот Расел Мартин кој што убаво ми објасни каков план има за тимот со мене во него, и мора да кажам дека тој разговор имаше големо влијание на мојата одлука. Едноставно ми се допадна она што го чув. Немаше многу дилеми. Глазгов Ренџерс е еден од најголемите, најтрофејните клубови на светот“ – вели Бојан Миовски за Спортспорт, и веднаш споделува ТОП информација.
Денеска стартер во големото дерби против Селтик
Да биде ситуацијата уште подобра за Миовски веќе денеска од 13:00 часот на Иброкс парк, легендарен фудбалски стадион се игра големото, вечно градско дерби помеѓу Ренџерс и Селтик.
„Ма какво прилагодување, каква аклиматизација. Авион, претставување, тренинг, запознавање со базата, и денеска дерби со Селтик. Хахах…. па супер бре…. подобро не може, што може повеќе да посакам. По лошиот третман во Џирона и начинот на кој што мора да кажам не бев испочитуван. Ова е прекрасен развој на настаните„ – вели Миовски па самиот продолжува.
„Џирона? Завршена приказна. Тоа е зад мене. Уште од стартот на преодниот рок јасно ставив до знаење. Не сакам да одам на позајмица, сакам да си заминам од таму. Имав огромен број на понуди да заминам но како играч на Џирона, некаде на шест месеци или година. Јас таа опција ја отфрлил од старт. Сакав да си заминам од таму. Ренџерс и четиригодишниот договор кој што ми беше понуден е одлична опција. Шкотска и Премиер лигата тука, не можам да кажам дека ми беа фаворит, но кога веќе Ренџерс се појави како опција немав дилеми“ – вели Миовски.
На него му ја посакуваме сета среќа на овој свет, и головите за Ренџерс нека стартуваат уште денеска од 13:00 часот. Можеби половина од Глазгов навива за Ренџерс, а другата половина за Селтик, но едно знам. Дека целиот Штип, а и Македонија од денеска е фан на овој легендарен клуб.
