Алкалоид има десет гола негатива по првиот меч против Хановер за место во групната фаза во Европската Лига. Бундес-лигашот ги казни сите грешки и нереализирани седмерци и отворени шутеви на македонскиот тим, и славеше со 37-27.
Хановер на овој двомеч влезе како голем фаворит, со оглед на шампионатот од каде доаѓа, но резултатот според македонскиот репрезентативец, Мартин Велковски не е реален.
„По мене, ова е доста нереален резултат, затоа што мислам дека имавме добра игра во нападот, но промашивме доста седмерци, доста контри, отворени шутеви, што е недозволиво за ваков тип од натпревар. Потфрливме во реализацијата, бевме казнети. Најголемата разлика беше конечните десет гола разлика, за кои уште еднаш велам дека се нереален резултат затоа што тоа не е вистинска слика од случувањатаа на теренот. Треба повеќе да се фокусираме да ги реализираме тие чисти ситуации и да не ни се повтори нивниот голман да има таква партија во Скопје. Што се однесува до квалитетот на нивниот голман на мечот со нас, тоа донесе мал пад, деконцентрација, можеби и пад на самодоверба во некои моменти… и тоа мора да го поправиме пред мечот во Скопје“, вели Мартин Велковски.
Реваншот меѓу Алкалоид и Хановер е закажан за 6. септември во салата „Автокоманда“.
