Словенската кошаркарска репрезентација на Европското првенство доживува две сосема спротивни искуства. Додека Лука Дончиќ игра на ниво што го носи кон нов личен рекорд, одбраната на тимот никогаш не била попропустлива, пренесува словенечкиот портал RTV SLO.
Дончиќ во лов на сопствен рекорд
Лука Дончиќ фантастично го започна Евробаскетот, постигнувајќи дури 99 поени на првите три натпревари, што му носи просек од импресивни 33 поени по меч. Доколку продолжи со ова темпо, на добар пат е да го сруши сопствениот рекорд од првенството во 2022 година, кога во просек бележеше 26 поени.
Во историјата на настапите на европските првенства на Словенија, само двајца играчи освен него завршиле турнир со просек повисок од 20 поени – Горан Драгиќ на Евробаскет 2017 (22.6 поени), кога Словенија освои злато, и Теоман Алибеговиќ во 1995 година (20.2 поени).
Одбрана што испишува негативна историја
Од друга страна, одбранбениот учинок на Словенија е причина за загриженост. Репрезентацијата до ова првенство никогаш во својата историја на европските настапи немала примено 100 или повеќе поени на еден натпревар. Најмногу што им дозволиле на ривалите било 99 поени против Латвија во 2001 година.
Меѓутоа, на овој турнир тој негативен праг беше надминат на два последователни меча. Пред да дојде до првата победа на турнирот (против Белгија 86:69), Словенија најпрво загуби од Полска со 95:105, а само два дена подоцна и од Франција со 95:103, се наведува во текстот.
