Новата ракометна сезона ќе почне со дерби дуелот меѓу Вардар 1961 и Пелистер во рамките на Супер-Купот. Ракометната федерација одлучи мечот да се одигра во Салата „Јасмин“ во Кавадарци. Натпреварот е закажан за утре со почеток во 19 часот. Минатата сезона овој пехар му припадна на Алкалоид.
Последните две средби меѓу двата ривали минаа во знакот на Пелистер. Битолчани прво во СЦ „Јане Сандански“ ја освоија шампионската титула, а пред четири дена исто на теренот на „црвено-црните“ го освоија пехарот во првото издание на Регионалниот турнир.
Битолчани се гладни за нова победа и нов пехар. „Чкембари“ веќе се мобилизираат за дуелот во Кавадарци, на социјалните мрежи потсетија на дел од атмосферата кога двата тима се сретнаа во овој град.
