Еден европски и три домашни ракометни натпревари се резервирани за саботниот распоред.
Бутел Скопје во малата сала во „Јане Сандански“ го пречекува Дуделанж во рамките на реванш мечот од првото квалификациско коло во ЕХФ Европскиот Куп. Мечот е закажан со почеток во 18:00 часот, а влезот за сите љубители на ракометот ќе биде слободен. На првата средба избраниците на Горан Кузманоски славеа со 31-27, со оглед на тоа дека доминираа, очекуваме нова победа за пласман во второто коло во ЕХФ Европскиот Куп, кој минатата сезона го освои Алкалоид.
Кога сме кај Кирил Лазаров и неговите момци, по ремито со ГРК Охрид на домашен терен, денеска му гостуваат на Тиквеш, во меч од второто коло. Овој дуел стартува во 18 часот. Во истиот термин Пелистер го пречекува Пролет, додека половина час подоцна ГРК Охрид е домаќин на Струга во езерското дерби.
