Речиси 400 хулигани на фудбалските клубови Шалке 04 и Борусија Дортмунд учествувале во масовна тепачка во саботата навечер во близина на железничката станица Дортмунд. Полицијата привела голем број демонстранти и запленила боксерски ракавици, завои, маски за скијање и штитници за заби, пренесува Билд.
До масовниот судир на североистокот од Дортмунд дошло додека навивачите на Шалке со воз се враќале дома по гостинската победа против Магдебург (2:0). За време на минувањето низ Дортмунд, навивачите двапати ја повлекле кочницата за итни случаи за да го запрат возот. При второто запирање, околу 22:50, поголема група навивачи на Шалке го напуштила возот и се упатила кон блиската шума.
Таму, според полициското соопштение, ги чекала ривалска група „насилни навивачи на БВБ и 1. ФЦ Келн“, по што започнал физичкиот судир.
На местото брзо пристигнале силни единици на редовната и сојузната полиција. Затекнале повеќе од 300 навивачи на Шалке и недалеку од нив околу 90 приврзаници на Борусија Дортмунд, меѓу кои имало и навивачи од Келн.
Портпаролот на полицијата изјавил дека кај многумина учесници биле забележани повреди во вид на црвенило на рацете и лицето. Поради лица кои се наоѓале на шините, во акцијата бил вклучен и полициски хеликоптер.
Полицијата истражува дали ривалските групи однапред се договориле за тепачката, а засега нема информации за бројот на повредени. Навивачите на Шалке, по полициската обработка и со придружба, биле вратени во возот со кој го продолжиле патувањето кон Гелзенкирхен.
Нов инцидент неколку часа подоцна
Насилството продолжило и подоцна во ноќта. Околу 2:38 часот, триесетина непознати лица упаднале на приватна прослава во клупски дом во Ротхаузен. Според сведоци, уништувале мебел, напаѓале гости. Во овој инцидент немало повредени, а полицијата истражува можна поврзаност со масовната тепачка.
