Уф, каков меч на Арената меѓу Работнички и Брера, кој струмичани го добија со 3:4. Одамна не сме гледале ваков меч, не толку квалитетен колку што беше возбудлив и супер- интересен.
На крајот струмичани ги освија сите три бода, екстра значајни а Работнички ќе се прашува дали смееше вакво нешто да дозволи.
Кога Брера во 5.минута преку Михаилов поведе со 0:1, никој не помислуваше дека на оваа средба ќе има голеада.
И имаше и тоа каква.
Веќе во 28.минута Кадриу израмни на 1:1, се чинеше дека Работнички ќе го сврти резултатот, но место тоа нов гол за струмичани и тоа преку Ндзенгуе од пенал за 1:2 во 43.минута. И тоа не беше се од првиот дел, Наумчевски стрелаше за 1:3, резултат со кој се замина на пауза.
А во второто полувреме Работнички напаѓаше, имаше шанси, постигна и гол за 2:3 во 73. преку Имери од пенал.
Сепак Брера знаеше како, две минути подоцна Ндзенгуе со својот втор гол носи 2:4 за гостите, и тука се реши победникот.
До крајот Работнички со прекрасниот гол на Имери, исто втор, од слободен удар успеа само да го ублажи поразот за конечни 3:4.
Сега веќе и дефинитивно се гледа дека Работнички е во страшна криза, не оди па не оди. Само една победа и едно реми на осумте средби, а Брера на 6.место со 11 бодови.
