Манчестер Јунајтед вечерва ја оствари својата прва победа над Ливерпул на „Енфилд“ по девет години, откако со головите на Брајан Мбеумо и Хари Мегваер славеа со 2-1 на гостински терен и потсетија на дел од најдобрите денови на клубот од пред повеќе од една деценија.
Мизеријата на Јунајтед на гостувањата кај Ливерпул го достигна својот врв во дебитантската сезона на Ерик тен Хаг на чело на тимот, кога Ливерпул го победи својот најголем ривал со 7-0 на 5 март 2023 година. Пред денешниот дуел, последната победа на „црвените ѓаволи“ во Премиер лигата на „Енфилд“ беше на 17 јануари 2016 година, кога Вејн Руни го постигна единствениот гол на натпреварот во победата од 1-0. Тогаш Јунајтед беше предводен од Луј ван Гал, а по него, па се досега, на клупата се сменија седум различни менаџери.
Ливерпул до денеска немаше пораз од Манчестер Јунајтед на „Енфилд“ на 10 последователни средби.
