Комесарот на НБА, Адам Силвер, за првпат јавно проговори за апсењето на кошаркарот на Мајами Хит, Тери Розиер, кој се најде во центарот на федерална истрага за нелегално обложување.
Зборувајќи за време на преносот од натпреварот Бостон – Њујорк на „Прајм Видео“, Силвер објасни дека лигата претходно спровела сопствена истрага и дека е шокиран од најновите случувања.
„Бев длабоко вознемирен. Нема ништо поважно за лигата и нашите навивачи од интегритетот на натпреварувањето. Чувствував тежина во стомакот, беше многу вознемирувачко“, рече Силвер.
Комесарот откри дека НБА спроведе внатрешна истрага откако регулаторите пријавија сомнителни исплати за натпревар од март 2023 година. Потоа Розиер беше ослободен од сомнение и продолжи да игра, но федералната истрага остана отворена.
„Бевме целосно транспарентни. Иако имаше необични плаќања, не пронајдовме ништо конкретно“, рече Силвер.
Силвер истакна дека федералните власти имаат многу поголеми овластувања, вклучително и употреба на судски налози и други инструменти што не се достапни за лигата, што на крајот доведе до обвинение против Розиер две и пол години подоцна. Во федералната истрага беа вклучени повеќе од 30 лица, вклучувајќи го тренерот на Портланд Треил Блејзерс, Чонси Билапс, и самиот Розиер.
НБА привремено ги суспендираше двајцата играчи додека трае постапката и најави дека ќе ја анализира содржината на обвиненијата.
