По значајната победа на гости против Тиквеш во Кавадарци, Арсими се подготвува за следниот предизвик во рамките на 11-то коло од Првата Фудбалска Лига, каде ќе се соочи со Работнички.
Атмосферата во таборот на Арсими е позитивна, а победата во Кавадарци донесе дополнителна мотивација и самодоверба кај фудбалерите.
“По победата против Тиквеш на гостински терен, напорно работевме и за овој натпревар во средината на неделата против екипата на Работнички. Нормално дека сме среќни што ја добивме средбата со Тиквеш, затоа што ги имавме нашите шанси и ги искористивме максимално. Тоа беше голем пресврт на резултатот и ја постигнавме нашата цел победата, изјави дефанзивецот на Арсими,Цуцули. Сега пред нас имаме противник како Работнички. Знаеме дека и тие не се во најдобра форма, но тоа не не интересира. Ние ќе излеземе на терен само со цел за победа. Сакаме да фатиме ритам на победи и да докажеме дека триумфот во Кавадарци не беше случајност”, додаде Ајрадин Цуцули дефанзивецот на Арсими.
Работнички подолг период нема победа во шампионатот, а по ремито на домашен терен против Македонија ЃП во минатото коло, се надева дека конечно ќе го „скрши мразот“ на гостувањата и ќе стигне до прв триумф на денешниот дуел против Арсими.
„Арсими покажа дека одлично се снаоѓа во елитното друштво, впрочем веќе освои 11 бода и забележа неколку резултати за почит. Од друга страна, ние сѐ уште резултатски се мачиме и мислам дека засега игрите се подобри од резултатите. Се надевам дека на денешниот меч против Арсими конечно ќе одиграме квалитетно на гостувањата и дека ќе успееме да ги освоиме бодовите“, изјави офанзивниот играч за врска, Бразилецот Калани Алмеида.
Арсими влегува во овој дуел од осмата позиција со 11 бода, додека Работнички е претпоследен и досега има освоено само шест бода.
