Ѕвездата на Шарлот Хорнетс, Ламело Бол, е казнет со 35.000 долари за непристоен гест на теренот, објави НБА. Инцидентот се случил за време на тешкиот пораз на неговиот тим од Мајами Хит во вторник.
Во четвртата четвртина од натпреварот, кој заврши со резултат 144:117 за Хит, Бол беше казнет за офанзивен прекршок. Фрустриран од одлуката на судиите, тој им покажа среден прст, што веднаш му донесе техничка грешка.
Ова не е прв пат 24-годишниот Бол да биде казнет за своето однесување. Казната од 35.000 долари е втора најголема во неговата кариера, откако минатата година мораше да плати дури 100.000 долари за употреба на „навредлив и погрд“ јазик за време на интервју по натпреварот.
Бол, кој ја игра својата шеста сезона со Хорнетс, беше избран како трет пик на драфтот во 2020 година и веднаш беше прогласен за најдобар дебитант во сезоната. Својата најдобра сезона ја одигра една година подоцна, кога беше избран за прв и единствен пат за Ол-стар натпреварот, забележувајќи просек од 20,1 поен, 7,6 асистенции и 6,7 скока.
Сепак, неговиот понатамошен напредок беше забавен од повреди. Во текот на последните три сезони (2022/23 до 2024/25), тој играше само 105 натпревари, а пропушти 141. Минатата сезона имаше просек од 25,2 поени по натпревар, што е највисок резултат во кариерата, во 47 настапи, но Хорнетс завршија со резултат 19-63, пропуштајќи ги плејофот деветта година по ред.
