Тотенхем го поддржува својот играч Дестини Удоги на кого му се заканувале со пиштол. Британската полиција уапси 31-годишен маж во врска со инцидент што се случил на 6 септември.
Би-Би-Си неодамна објави дека уапсениот фудбалски агент кој му се закани на неименуван играч со пиштол е од Премиер-лигата, а Тотенхем даде изјава по синоќешниот натпревар против Копенхаген (4-0) во Лигата на шампионите.
„Ние го поддржуваме Дестини и неговото семејство и ќе продолжиме да го правиме тоа. Со оглед на тоа што ова е правно прашање, не можеме да коментираме понатаму“, се вели во соопштението на лондонскиот клуб.
Полицијата соопшти дека го уапсила мажот два дена по инцидентот со Удоги.
„Нема повредени во ниту еден од инцидентите. Еден маж е уапсен под сомнение за поседување огнено оружје со намера, уцена и возење без дозвола. Тој е ослободен со кауција во исчекување на истрагата“, соопшти полицијата.
