По убедливиот пораз од Арсими, Башкими сака да се врати на победничките патеки и тоа против Работнички во меч од 13-тото коло во ПМФЛ.
Во првиот дел од сезоната Башкими во Скопје триумфираше со 2:0, но традицијата е на страната на Работнички. Во досега одиграни 17 натпревари, 9 победи се за Работнички, 4 за Башкими, а 4 натпревари завршиле нерешено.
Сепак, според Адис Мурати, работите ќе се одвиваат во позитивна насока, бидејќи трите бода се императив за кумановскиот тим.
„На прв поглед, натпреварот изгледа лесен, но Работнички е најопасен кога е во криза. Ние сме мотивирани и сакаме што побрзо да го заборавиме поразот од ФК Арсими. Играме во Куманово, на нашиот стадион, што го гледам само како олеснување и дополнителен мотив, а никако како комодитет. Трите бода против Работнички се императив за да бидеме помирни во продолжението на првенството“, изјави меѓу другото Адис Мурати.
Работнички игра очајно во новиот шампионат и после 12 одиграни натпревари освои само седум бода. „Романтичарите“ никако не успеваат да фатат позитивен ритам, а тимот се надева дека можеби денешното гостување во Куманово ќе биде пресвртница.
Играчот за врска Теодор Николовски верува дека Работнички може да оствари позитивен резултат.
„Не сме во најдобар момент и никако не успеваме да фатиме стабилност и да одиграме неколку добри натпревари во низа. Бодовното салдо е многу скромно и затоа Работнички размислува да освои три бода на секој нареден натпревар. Сите се надеваме дека ова гостување во Куманово и дуелот со Башкими може да биде пресвртница“, изјави Теодор Николовски.
Натпреварот меѓу Башкими и Работнички ќе се одигра на стадионот на Башкими во 13:00 часот.
