Она што денеска го најавивме го видовме на дело. Алкалоид уште еднаш испрати порака дека ги респектира фаворитите, но и дека не простува. Победничкиот менталитет кој Кирил Лазаров го градеше како играч полека, но сигурно го пренесува на својот млад тим.
И на минус седум гола негатива, Алкалоид продолжи да игра и да го бара патот за целосен кам-бек. Лазаров успеа да издигне своите момци, да ги охрабри дека и во распродадената сала „Боро Чурлевски“ можат да си заминат со голем резултат.
Лазаров во стилот на големи шахисти го надмудри Рубен Гарабаја, точно знаеше во кој момент што да дозира на теренот, неговите совети беа спроведени на дело, а наградата дојде на крајот. Кога сите помислија дека Пелистер сепак ќе победи, Иван Галевски потврди зошто е „мајстор“ за пенали. До него не допреа провокациите од Хосни, го одбрани ударот на Радивојевиќ од седум метри за бод како планина и потврда дека Алкалоид треба да продолжи да го гради патот со македонски погон, а со тоа да вложува во иднината на овој спорт, кој е број еден. И не само репрезентативно, туку и во домашниот шампионат.
Момците во „сино-белиот“ дрес заслужено се радуваа на крајните 26-26, впрочем ова е прв бод за нив во Битола против големиот Пелистер.
