Пелистер не мина според очекувањата против младиот тим на Алкалоид, не успеа да дојде до победа, мечот од 14. коло во Супер-лигата заврши без победник 26-26. Иако актуелниот првак водеше со седум гола, избраниците на Кирил Лазаров се издигнаа како фенис и на 20 секунди до крајот изедначија на 26-26. Галевски одбрани пенал за голем бод од Битола.
Големата голманска надеж на крајот зад своето име запиша седум одбрани. Прв стрелец кај Алкалоид беше Стојковиќ со осум гола, шест имаше Ѓоргиев. На другата страна Митревски запиша 13 одбрани, Манасков девет гола.
Добро прво полувреме во Битола. Кузмановски го отвори дуелот (1-0), Алкалоид со голот на Митев поведе со 2-3, по што Пелистер успеа да поведе со 6-3. Лазаров во игра го стави Игор Ѓоргиев, кој постигна три гола во низа, Велковски со првиот погодок донесе водство од 6-7 на средината на првото полувреме. Последното водство Алкалоид го имаше во 21 минута (10-11) по што влезе во серија на грешки, а противникот неше подоцна казни и дојде на плус плус пет 17-12. На одморот беше 17-13.
Во вториот дел домашниот набрзина на крилата на Никола Митревски дојде до водство од седум гола 23-16, но Алкалоид не се откажа, од овој момент направи серија од 6-1 за 24-22 во 52 минута. Младиот тим на Лазаров не искористи два напади за уште поголема драма. Галевски имаше важни одбрани.
После долго време Пелистер успеа да реализира и тоа од седум метри, Манасков беше прецизен. Во 55-та минута при 25-23, Карасманакис доби две минути исклучување, а потоа Пелистер и пенал, момент кој беше од голема корист, но Галевски го одбрани ударот на Манасков.
Серафимов реализираше од седум метри за 25-24 (56. минута) во период кога неговиот тим имаше играч помалку. Кузмановски од истата позиција зголеми на 26-24. Следеше одговор од Стојковиќ за 26-25. Галевски запиша нова одбрана, а Алкалоид преку Ѓоргиев изедначи на 26-26 на 20 секунди до крајот. Пешевски успеа да се избори за пенал, Галевски го одбрани ударот на Радивојевиќ за реми и голема радост.
Ова реми го чини Пелистер чекор назад кон атак на првото место. Вардар сега има 28 бода или четири повеќе од битолчани, додека третото место го делат ГРК Охрид и Алкалоид кои имаат 21 бод.
