✍️ Огнен Чак Дојчиновски
Вардар е на чекор со освојување на есенската титула во домашниот шампионат. Математички тоа секако треба да се случи во следното 16. коло од ПМФЛ есенската полусезона, но од друга страна пак, реално гледано, Вардар и до сега покажа дека има капацитет, квалитет и сила за такво нешто.
Вардар со месеци на терен доминира. А изведбата денеска против Шкупи на ФФМ и победата од 6:1, е само парче од мозаикот кој Гоце Седлоски со месеци го склопува.
Вардар денес одигра шампионски. А капитенот Азер Омерагиќ лидерски. Момчето кое што истрпе многу критики, ги понесе на свој грб, за да во прав момент, пред самиот крај на полусезоната, кога најмногу треба да се покаже сила, постигне три гола.
Хет трик во противничката мрежа и славје со навивачите на Вардар. Среќата го посака трите гола да ги даде на страната каде што се Комитите. И тие и тој беа тука кога беше најтешко. Истрпеа се, за да ете, дојдат до она што го посакуваат.
Комити до славје на победничка низа која трае со месеци, а Омерагиќ до предводник на шампионски тим кој што „гази“ се пред себе.
А капитенот? Навикнат е на притисок, имун на критиките. Зошто е вардарово дете, и знае што значи тој свет „црвено – црн“ дрес. И не сака ништо за возврат. Туку само почит и поддршка од оние кои имаат морално право тоа да му го дадат на најдобриот фудбалски колектив во Македонија, ФК Вардар.
