Иако е млад тим и има состав во кој доминираат македонски ракометари, Алкалоид од првиот ден кога се оформи стана инспирација за силните клубови и нивните фанови. На хартија во пресметките со имиња како Пелистер и Вардар 1961, од оваа сезона и ГРК Охрид, никогаш ја немаат фаворитската улога, но на терен многупати покажаа дека не само што знаат да се носат со противници кои своите состави ги градат според европските амбиции, туку и мечевите ги завршуваат во своја корист.
Па токму од овие причини дуелот меѓу Пелистер и Алкалоид го носи епитетот на второ дерби во рамките на 14 коло во Супер-лигата. Мечот се игра во салата „Боро Чурлевски“ со почеток во 19:30 часот.
Дека младите момци на тренерот Кирил Лазаров се инспирација, говори и фактот дека салата е распродадена како првакот да игра меч од Лигата на шампиони или пак против Вардар 1961. Сето ова е добро и за Алкалоид, кој од ден во ден добива потврда дека е на вистински пат, но и за Пелистер, бидејќи важи за еден од тимовите кои има максимална поддршка. Битола го сака ракометот.
Првата средба меѓу овие два тима заврши без победник, Алкалоид беше на чекор до победа против шампионот, но направи грешка во клучниот напад, а противникот казни за реми.
Полната сала во Битола ќе биде вистински тест за младиот состав на тимот од Автокоманда, кој го нема на располагање Урош Борзаж, еден од двајцата странци во составот. На другата страна Пелистер ќе мора да дојде до целиот плен доколку сака да остане блиску до директниот конкурент за титулата – Вардар 1961, кој пак нема пораз и после 14. меча во Супер-лигата.
