Струга ТЛ – Башкими 6:0 е исходот од денешниот меч од 15.коло во ПМФЛ, кој се одигра на Градскиот стадион во Струга. Доминантно, силно, умешно, со многу шанси и со ШЕСТ голови во мрежата на слабиот кумановски тим кој во целост беше надигран од четата на стратегот Бледи Шкемби.
Се почна со шансата на Фал во 11.минута, потоа следуваше голот на Малески кој беше поништен, оправдано, поради офсајд.
И конечно во 24.минута, Буњамин Шабани убаво се снајде пред голот на гостите за водство од 1:0. Во 37.минута веќе беше 2:0, откако Фал нафрли од левата страна, а Малески погодува за 2:0. Да кажеме дека Радески имаше две убави шанси, но немаше среќа. Затоа Јевтоски од далечина успеа да погоди за 3:0, резултат со кој се замина на пауза.
Веќе во 53.минута уште еден гол за домашните. Судијата Грујоски покажа слободен удар за Струга ТЛ на околу 18-19 метри од голот на гостите. Хамза со прекрасен удар ја тресе мрежата на Башкими за веќе убедливи 4:0.
Но, тоа не беше се од Струга ТЛ. Се играше 62.минута кога Малески со убав удар го погоди спротивниот агол на голот на кумановци за 5:0. Колку за потсетување, и во Куманово резултатот на крајот беше кога играа Башкими и Струга ТЛ, 5:0 за стружани.
Домашните и тука не застанаа, сакаа уште некој гол, и до тоа дојдоа во 84.минута кога Воша реализираше за 6:0.
Ова беше последен меч за Струга ТЛ на свој терен за оваа есенска полусезона, за оваа 2025 година. Во последното коло му гостува на Тиквеш. Четата на стратегот Бледи Шкемби сеуште е во игра за есенски првак, но тоа ќе се решава во последното коло кога играат Македонија ЃП – Вардар и Тиквеш Струга ТЛ.
