Повеќе од јасно дека целта на Барселона е да направи што е можно повеќе промени во играчкиот состав следното лето, а поради финансиските проблеми што ги мачат со години, не се во можност да трошат големи пари. Прва цел е да се доведе нов напаѓач бидејќи Роберт Левандовски е на крајот од кариерата, а Ерлинг Халанд, Хулијан Алварез и Хари Кејн се најспомнувани во последно време.
Вчера, Мундо Депортиво објави дека Халанд и Алварез се невозможна мисија бидејќи чинат над 100 милиони евра, и дека единствената реална опција е Кејн, кој ќе има откупна клаузула од 65 милиони евра следното лето. Сепак, утрово се појави уште едно интересно име кое Барселона го следи внимателно.
Како што објави германскиот новинар Флоријан Плетенберг, не е невозможно Барселона да го доведе Серху Гираси, кој игра во одлична форма во дресот на Борусија Дортмунд. Јасно е дека Каталонците немаат финансиска можност да доведат „суперѕвезда“, поради што веќе бараат поевтини опции.
Првата цел ќе биде Кејн, но доколку одлучи да остане во Баерн, тогаш постојат големи шанси „блауграната“ да тргне по Гираси. А овој напаѓач има откупна клаузула од околу 50 милиони евра во договорот со Дортмунд, што е многу поприфатлива опција за Барселона.
Во тековниот дел од сезоната, Гираси одигра 22 натпревари во сите натпреварувања каде што успеа да постигне 13 гола и да додаде четири асистенции. Од неговото доаѓање во Дортмунд, тој постигна вкупно 47 гола на 67 натпревари, што е навистина импресивно.
