Наполи и Елиф Елмас запишаа голема победа во 13-тото коло во Серија А, откако вечерва го победија Јувентус на својот стадион со 2:1, во големото дерби.
Херој на шампионите на Италија беше двојниот стрелец Расмус Хојлунд, додека голот за гостите од Торино го постигна Кенан Јилдиз.
Лучано Спалети се врати на „Марадона“, каде пред две години доби ранг на „божество“, бидејќи му го донесе на Наполи Скудетото по 33 години чекање. Но радоста не му траеше долго, бидејќи Антонио Конте, кој го донесе Скудетото во Неапол оваа година, целосно го надмудри.
„Наполитанците“ беа многу подобар тим и заслужено го слават триумфот што ги однесе на врвот на табелата со 31 бод. Елмас одигра уште еден комплетен меч иако на поинаква улога, но покажува дека полека ја добива довербата на тренерот.
