Клубовите во Саудиска Арабија трпеливо го чекаат исходот од спорот меѓу Мохамед Салах и менаџерот Арне Слот пред да дадат формална понуда за незадоволната ѕвезда на Ливерпул. Тензиите ескалираа откако Египќанецот јавно ја изрази својата фрустрација што е изоставен од почетниот состав минатиот викенд, а неговата иднина на „Енфилд“ сега е понеизвесна од кога било.
Се очекува Слот и 33-годишниот Салах да одржат нови разговори во следните 48 часа за да се обидат да ги решат своите разлики. И покрај шпекулациите во медиумите, Ливерпул официјално инсистира дека Салах не е на продажба. Клубот потсетува дека Египќанецот потпишал нов договор вреден повеќе од 400.000 фунти (околу 460.000 евра) неделно само пред неколку месеци и очекуваат тој да го почитува до крај, верувајќи дека проблемот со менаџерот може да се реши преку внатрешен договор.
Извори од Про лигата се сомневаат во искреноста на намерите на Ливерпул. Тие веруваат дека ова е само стратегија за заштита на високата трансфер вредност на Салах и внимателно ја следат ситуацијата. Доколку Ливерпул одлучи да ја продаде својата ѕвезда, три клуба веќе се во ред, пишува Дејли Меил. Тоа се Ал Хилал, Ал Кадиса и Неом.
Да потсетиме дека Ливерпул веќе одби понуда од Ал Итихад вредна повеќе од 170 милиони евра во 2023 година. Американските клубови од МЛС, Сан Диего и Чикаго Фајер, исто така, покажаа интерес, но тешко можат да си дозволат да ја доведат египетската ѕвезда освен ако не одлучи да ги намали приходите.
Салах е дел од тимот на Ливерпул од 2017 година и одигра 420 натпревари за него, постигнувајќи 250 гола и 116 асистенции. Со Ливерпул освои осум титули, вклучувајќи две за најдобриот тим во Премиер лигата и една за победникот во Лигата на шампионите.
