Борбата за титулата во англиската Премиер лига станува сè поожестока. Иако Арсенал во саботата со драматична победа против Вулверхемптон (2:1) ја задржа лидерската позиција, главните конкуренти не попуштаат. Манчестер Сити и Астон Вила исто така запишаа победи и останаа во чекор со врвот на табелата.
Сити со убедливи 3:0 славеше на гостувањето кај Кристал Палас, а иако Ерлинг Халанд постигна два гола, легендарниот Џејми Карагер во прв план го стави Фил Фоден. Младиот Англичанец во последните четири првенствени кола постигна дури шест гола, со што повторно ја воодушеви фудбалската јавност.
„Пред една-две години беше играч на сезоната, но минатата година од некоја причина не беше на своето ниво. Сега изгледа како целосно да се врати“, изјави Карагер и додаде: „Кога Фоден е во топ-форма, тој е еден од најдобрите играчи во лигата. Постојано повторувам – не е Халанд тој од кого Арсенал треба најмногу да се плаши, туку токму Фоден. Халанд е константа, постигнува 30 или 40 голови секоја сезона. Но ако Фоден повторно ‘влезе во ритам’, ќе биде вистинска напаст и голема грижа за конкуренцијата.“
Карагер се осврна и на Астон Вила, која се наоѓа само бод зад Сити и три бода зад водечкиот Арсенал. Клубот од Бирмингем ја продолжи својата сензационална серија со победа од 3:2 против Вест Хем, иако двапати беше во негатива.
„Ако зборуваме за тренери, во моментов само Гвардиола е над Емери. Погледнете го неговото СV и сè што има направено во кариерата – тоа е врвно ниво“, заклучи Карагер.
Борбата за титулата допрва започнува. Веќе следната недела Астон Вила ја очекува дерби дуел со Манчестер Јунајтед, додека Сити најпрво ќе го игра четвртфиналето од Лига купот против Брентфорд, а потоа во сабота го пречекува Вест Хем.
