Младиот напаѓач на Реал Мадрид, 19-годишниот Бразилец Ендрик ќе игра на позајмица во Лион до крајот на сезоната, потврди францускиот клуб на своите социјални мрежи. Поранешното „чудо од дете“ не успеа да се наметне во соблекувалната, па затоа реши да го побара спасот во Франција.
Главната причина за заминувањето е потрагата по повеќе време за играње, бидејќи младиот Бразилец сè уште се надева дека ќе биде на списокот за патување за Светското првенство во 2026 година. Со преселбата во редовите на „лавовите“, таа желба би можела да се оствари.
Дека промена во средниот ред е неопходна неодамна потврди и бразилскиот тренер, Италијанецот Карло Анчелоти, кој откри како разговарал со напаѓачот, велејќи му дека „важно е тој да игра“.
„Ендрик е многу млад, ова нема да биде неговото последно Светско првенство. Тој би можел да игра во 2026 година бидејќи го има потребниот квалитет, но и во 2030, 2034 или дури 2038 година. Важно е повторно да игра и да го покаже својот квалитет“, изјави неодамна бразилскиот тренер.
Ендрик пристигна во Реал во јули 2024 година од Палмеирас за приближно 60 милиони евра. Во дресот на мадридскиот клуб, тој одигра вкупно 40 натпревари и постигна седум гола, но оваа сезона ситуацијата е значително поинаква – младиот напаѓач играше само единаесет минути во Ла Лига.
Француските медиуми објавуваат дека Лион ќе плаќа половина од неговата месечна плата, која изнесува 400.000 евра, за време на позајмицата.
