Капитенот на Ливерпул, Вирџал ван Дајк, изјави дека проблемите на неговата екипа во одбраната при прекините „болат“, пренесе денеска Би-Би-Си.
Ливерпул оваа сезона прими 12 голови од прекини, што е најмногу во Премиер лигата, заедно со Борнмут и Нотингем Форест. На саботниот натпревар на „Енфилд“, кој Ливерпул го доби со 2:1, Вулверхемптон голот го постигна од корнер, додека минатата недела им се случи и против Тотенхем.
„Имаше многу натпревари на кои многу добро се браневме при прекините, но факт е дека примивме премногу голови на тој начин, а не постигнуваме доволно“, изјави Ван Дајк.
Тој нагласи дека проблемот најчесто не е во првиот дуел, туку во продолжението на акцијата.
„Во најмалку 75 отсто од ситуациите, па и повеќе, не станува збор за првиот контакт. Втората фаза е убиствена“, истакна холандскиот дефанзивец.
Ливерпул, без да се сметаат пеналите, постигна само три голови од прекини во првенството, со гол-разлика минус девет, што е најлош учинок на клубот во Премиер лигата според тој параметар.
„Примивме премногу голови од прекини и тоа боли. Мора да се поправиме, а тренингот е единствениот начин да бидеме подобри“, додаде Ван Дајк.
