Секоја чест за ОИ или ЕП, секоја чест за светските првенства во другите спортови, но СП за фудбал е нешто посебно, нешто што го тангира речиси секој втор или трет жител на оваа планета.
Па така претседателот на ФИФА, Џани Инфантино, изјави дека за 15 дена се примени 150 милиони барања за билети за Светското првенство во 2026 година, чии домаќини се САД, Канада и Мексико.
„Имаме достапни шест до седум милиони билети, а за 15 дена добивме 150 милиони барања. Тоа значи дека би добивале просечно десет милиони барања секој ден. Во речиси 100 години од Светското првенство, продадени се вкупно 44 милиони билети, па се покажува дека побарувачката за билети за претстојното Светско првенство опфаќа период од 300 години. Лудо е, тешко е да се замисли, но ја покажува важноста на Светското првенство во фудбалот“, рече Инфантино на Светскиот спортски самит во Дубаи.
Тој истакна дека најмногу барања за билети дошле од САД, по што следат Германија и Велика Британија.
Здруженијата на навивачи ја критикуваа високата цена на билетите, бидејќи цените се неколку пати повисоки отколку на последното Светско првенство во Катар. После тоа, ФИФА одлучи да продаде одредена количина билети по цена од 60 долари.
„Приходите генерирани од Светското првенство, што вклучува продажба на билети, ќе се вратат на фудбалските заедници низ целиот свет. Да не беше ФИФА, немаше да има фудбал во 150 земји“, смета првиот човек на ФИФА.
