Секако една од најважните вести пред новогодинешните празници на овие простори беше назначувањето на Гоце Седлоски за селектор на А-репрезентацијата на Македонија. И секако кога Седло е во прашање, тој е интересен за медиумите, посебно во Хрватска па така во интервјуто за Вечерни лист, најпрво се осврна на честитката која ја добил од Здравко Мамиќ:
“Меѓу оние кои ми честитаа беше и Здравко Мамиќ. Мене тоа многу ми значи со оглед на тоа дека за мене тој е мојот втор татко“ посочи некогашниот капитен на Динамо Загреб.
Златко Далиќ, Лука Модриќ и Јошко Гвардиол исто така ви честитаа со видео пораки. Како се случи тоа?
“Ја делев соблекувалната со Далиќ во Хајдук, играв со Лука во Динамо – кога штотуку пристигна од Интер, имаме одличен однос, еднаш нè угости мене и мојот син во кампот на Реал Мадрид, а јас го тренирав Гвардиол во Динамо II. Гвардиол играше за мене во четвртфиналето од Лигата на шампионите, против Бенфика во Нион, иако во тоа време веќе беше редовен во првиот тим под водство на Зоки Мамиќ. Го познавам Јошко многу добро, тој е одличен човек, можете да видите од таа честитка каков однос имаме. А Далиќ? Непотребно е да се зборува за неговите успеси, се сеќавам како се однесуваше со мене во Хајдук; бев дете и многу ми помогна како постар соиграч“.
Поранешниот селектор на репрезентацијата и поранешен тренер на Горица, Игор Ангеловски, протестираше против вашето назначување. Како се чувствувавте во врска со тоа?
“Воопшто не ме интересира тоа, секој има свое мислење“
Ќе ги вратите ли Ристовски и Адеми во репрезентацијата?
“Ќе почнам да ги повикувам играчите кои се главни столбови на репрезентацијата, вклучувајќи ги и оние што планирам да ги повикам. Секој што не мисли дека можеме да направиме нешто во Данска – нека не се качува ни во авионот. Ристовски и Адеми? Ќе видиме, има време, ќе разговарам со сите, вклучувајќи ги и тие двајца, за да чујам што мислат“.
Во оваа ситуација, кога Данска ве чека во дополнителните квалификации, не е ли тоа императив?
“Знаете каков сум; никогаш не сум се откажал, никогаш не сум признал на никого дека се подобри, не ми се допаѓаше да губам дури ни на тренинг. Но, селектор сум само неколку дена; не е исто да ја гледаш репрезентацијата од трибините и да бидеш меѓу играчите. Бев и капитен, со повеќе од сто настапи, но ова е сосема различно: сега морам да го поставам тимот, да ги мотивирам играчите и да ја одржам оваа добра група заедно. Што се однесува до Данска – да, тие се фаворити на хартија. Но, тоа е само еден натпревар; може да биде 90 минути, може да биде продолжение… Незгодно е што како нов селектор ќе имам само три дена да се подготвам за тој натпревар, и не може многу да се промени за три дена. Сепак, имам играчи кои го освоија третото место во групата, верувам во нив, 90 проценти од нив ќе бидат во селекцијата, ќе има некои новини. Ќе биде добар натпревар, се надевам со исход во наша корист. Исто така, му честитам на поранешниот селектор Милевски, кој ни ја даде оваа можност да се натпреваруваме за Светското првенство. Но, дозволете ми да ве потсетам, не мора само да се соочиме со Данска, имаме и уште еден натпревар што мора да го добиеме за да се квалификуваме за Светското првенство; против победникот од натпреварот Чешка – Ирска, повторно на гостински терен.
Каков е договорот со Федерацијата, дали сè уште ќе бидете тренер на „Вардар“?
“Знаеме каде беше „Вардар“ кога го презедов минатата есен (на 10-то место во лигата, забелешка), а сега по првата половина од сезоната сме водечки на табелата. Зад нас имаме големи ривали, Струга и Шкендија, па мојата работа во „Вардар“, кога станува збор за евентуално освојување на шампионската титула, не е ни блиску до завршување. Ги убедив момците во „Вардар“ дека вредат, ги турнав кон она што го имаме сега и ги убедив дека можат да го сторат тоа. Затоа сакам да ја завршам оваа сезона со нив, па договорот е дека ќе останам со нив до летото, а потоа целосно ќе се посветам на репрезентацијата“ изјави покрај другото Седлоски за Вечерни Лист.
