Грчкиот тенисер Стефанос Циципас изјави дека размислувал да ја заврши кариерата поради силни болки во грбот во текот на изминатата година.
„Најголемата грижа ми беше дали воопшто ќе можам да го завршам натпреварот. Се прашав: „Може ли да одиграм уште еден натпревар без болка?“ Бев навистина исплашен по мојот пораз на Отвореното првенство на САД во второто коло. Не можев да одам два дена. Тогаш почнувате да се прашувате за иднината на вашата кариера“, рече Циципас, како што објави Би-Би-Си.
27-годишниот Грк го имаше својот најдобар АТП ранг во 2021 година, кога беше трет тенисер во светот, а играше и две финалиња на Гренд слем турнири против српскиот тенисер Новак Ѓоковиќ, во 2021 година на Ролан Гарос и во 2023 година на Отвореното првенство на Австралија. Ги загуби и двата.
Циципас моментално е рангиран на 36-то место на АТП ранг-листата и одигра само два натпревари од Дејвис купот од поразот на Отвореното првенство на САД во август.
Тој рече дека има проблеми со грбот во последните шест до осум месеци, но е задоволен од моменталниот третман, кој го одржал без болки пет недели.
„Најмногу се радувам да видам како ќе оди мојот процес на тренирање со грбот. Мојата најголема победа во 2026 година би била да не морам да се грижам за завршување на натпреварите“, додаде тој.
Циципас ќе ја предводи Грција на Јунајтед Купот, ќе игра во Групата Е во Перт со Велика Британија и Јапонија.
„Сакам да дадам се од себе во 2026 година и на Јунајтед Купот. Вложив се од себе. Најважно е што целосно верувам дека можам да се вратам таму каде што бев. Ќе се обидам да го постигнам тоа“, рече Циципас.
Јунајтед Купот се игра од 2 до 11 јануари, една недела пред почетокот на првиот Гренд слем во сезоната – Отвореното првенство на Австралија.
