Тенискиот сојуз на Австралија (Tennis Australia) дел од својот спектакуларен раст на приходите го насочи назад кон играчите, објавувајќи дека наградниот фонд за годинашниот Австралијан опен ќе изнесува рекордни 64 милиони евра. Тоа претставува зголемување од 16 % во однос на лани, со што „среќниот Грен слем“ го престигна Вимблдон по висина на наградите, но и понатаму е зад US Open, кој располага со фонд од 77 милиони евра, пишува „The Guardian“.
Поголеми заработки на сите нивоа
Победниците во машка и женска конкуренција ќе заработат по 2,4 милиони евра, што е зголемување од 19 % во однос на 2025 година. Но, организаторите се погрижија зголемувањето да го почувствуваат сите учесници. Наградниот фонд е значително зголемен во сите кола, па тенисерите и тенисерките само за настап во првото коло ќе добијат 58 илјади евра. Дури и играчите кои ќе испаднат во најраната фаза од квалификациите турнирот ќе го напуштат со најмалку 23 илјади евра.
Вака богат награден фонд е овозможен благодарение на експлозијата на приходите на Австралискиот тениски сојуз. Според документите објавени во декември, сојузот во деловната година до септември 2025 остварил приход од 397 милиони долари, што е за 102 милиони повеќе од претходниот период. Иако изворите на растот не се детално разложени, најголемиот дел се припишува на операциите и настаните, вклучувајќи уплати од комерцијални, владини и медиумски партнери, како и продажба на билети.
Дополнителен придонес дадоа и новата стратегија за цените на билетите, како и новиот договор за телевизиски пренос со Channel Nine, вреден околу 45 милиони долари годишно. И покрај растот на трошоците, сојузот ја заврши годината со нето-вишок од седум милиони евра.
