Македонската Ракотмена федерација направи одличен потег. Пред стартот на Европското првенство, но и истекот на договорот на Кирил Лазаров, одлучи да ја продолжи соработката со актуелниот селектор, на нови три години.
Александар Стефанов, претседател на Ракометната федерација на Македонија по повод новиот потпишан договор изјави:
„Официјално ја продолживме соработката со селекторот на нашата машка сениорска репрезентација, Кирил Лазаров, со договор до 2029 година. Веруваме дека континуитетот и стабилноста се клучни за напредокот на националниот тим и македонскиот ракомет во целина. Се надеваме на успешна и плодна соработка во наредниот период, во кој со заеднички труд, посветеност и јасна визија ќе продолжиме да остваруваме добри резултати и да го развиваме нашиот спорт.“
Лазаров: Водењето на националниот тим е голема чест и одговорност
Селекторот Кирил Лазаров, секако дека со задоволство продолжува да ја води нашата репрезентација и планира да го прави тоа како и досега. Со огромна доза на професионализам, одговорност и национално чувство.
„На заедничко задоволство ја продолживме соработката со Ракометната федерација на Македонија. Водењето на национален тим, поготово на својата земја, е голема чест и одговорност. Благодарен сум за укажаната доверба и поддршка. Пред нас е период исполнет со сериозна работа, јасни цели и високи очекувања. Со заеднички труд, дисциплина и целосна посветеност ќе продолжиме да работиме на напредокот на националниот тим и достоинствено претставување на Македонија, со фокус на стабилност и резултати на долг рок.“ – изјави селекторот Лазаров.
