За првпат во македонската клупска историја во сезоната 2025/2026 имавме дури пет претставници во ЦЕВ европските клупски купови, од кои последниот наш тим, вицешампион Штип УГД, на Бадник, во Милано го заврши настапот во 1/16 финалето од Челинџ купот.
Во реванш дуелот со апсолутниот фаворит, италијански Алијанц Милано, македонскиот тим загуби во три сета и се одјави од Европа.
За штипскиот состав премиерата во европските клупски купови е историја и за клубот, и за градот. За да се најдат во главната рунда од Челинџ купот одбојкарите на Штип УГД мораа да ја минат првата пречка, норвешки Кол Ил, а во тоа успеаја откако во реваншот во Радовиш, прво со 3:0 ја анулираа стартната негатива, а потоа и преку „златен сет“ обезбедија пласман во 1/16 финалето.
Првите анализи по европската премиера се задоволство од постигнатиот успех и клупската историја која е испишана.
„Настапот во ЦЕВ Челинџ купот го завршивме онака како што и очекувавме пред стартот. Уште при ждрепката јасен беше нашиот пат – влез во главната фаза и двомеч со моќниот Алијанц Милано од Италија. Си поставивме за цел да ја поминеме екипата на Кол Ил од Осло, која и ја исполнивме и испишавме една историја, двојна за нашиот клуб. Првата е самото учество во ова европско клупско натпреварување, а втората е прва победа на европско тло, со која си обезбедивме и влез во главната фаза од Челинџ купот. Задоволството не само мое, туку и кај играчите, комплетниот стручен штаб, сите инволвирани во клубот, навивачите на Штип УГД кои се присутни на сите наши натпревари… Затоа верувам дека ова е нешто големо и е значаен успех и за клубот, но и за градот Штип, како и за македонската одбојка воопшто. Се надевам дека со овие резултати ќе поттикнеме пред се нови генерации да го засакаат овој убав спорт, но и останатите клубови од Македонија, да веруваат во меѓународниот успех, а со тоа да ја претставуваат Македонија и македонската одбојка. Одбојката е таков спорт што пред се создава нови пријателства, па така оваа историска авантура за Штип УГД, покрај искуството кое го стекнавме сите како екипа, стекнавме и нови контакти и пријателства од регионот и од цела Европа“, анализира тренерот Кристијан Ристески по завршувањето на настапот на Штип УГД во Челинџ купот.
По враќањето од Милано екипата има четири дена одмор, односно до 12. јануари кога продолжува со тренажниот процес и подготовките за вториот дел од домашното првенство, каде е еден од фаворитите за шампионската титула, како и Купот на ОФМ 2026 во кое влегуваат како двократен бранител на пехарот.
